પ્રવાસીઓના જીવ તાળવે ચોંટ્યા, દિલ્હીથી શ્રીનગર જઈ રહેલી ઇન્ડિગોની ફ્લાઇટ 6E2142 ને હવામાં ખરાબ હવામાનનો સામનો કરવો પડ્યો,
દિલ્હીથી શ્રીનગર જઈ રહેલી ઇન્ડિગોની ફ્લાઇટ 6E2142 ને હવામાં ખરાબ હવામાનનો સામનો કરવો પડ્યો હતો, જેના કારણે વિમાનના આગળના ભાગ (નોઝ કોન) ને ભારે નુકસાન થયું હતું. આ ઘટનાનો એક વીડિયો સોશિયલ મીડિયા પર વાયરલ થયો છે, જેમાં મુસાફરોનો ગભરાટ અને ચીસો સ્પષ્ટપણે જોઈ શકાય છે.
આ ઘટના બુધવારે મોડી સાંજે બની હતી જ્યારે ફ્લાઇટ શ્રીનગર નજીક પહોંચી રહી હતી. ભારે કરા અને તોફાનના કારણે વિમાન ખરાબ રીતે ધ્રુજી રહ્યું હતું. વિમાનમાં બેઠેલા એક મુસાફર દ્વારા રેકોર્ડ કરાયેલા વીડિયોમાં કરા વિમાન પર અથડાતા અને મુસાફરોની ગભરાટભરી પ્રતિક્રિયાઓ જોવા મળે છે.
પાયલોટે ATC ને કટોકટીની માહિતી આપી
હવામાનની સ્થિતિ બગડતા, પાયલોટે તાત્કાલિક શ્રીનગર એર ટ્રાફિક કંટ્રોલ (ATC) ને કટોકટીની જાણ કરી હતી. જોકે, પાયલોટ અને ક્રૂની સૂઝબૂઝ અને સમયસર કાર્યવાહીને કારણે, વિમાનને સાંજે 6:30 વાગ્યે શ્રીનગર એરપોર્ટ પર સુરક્ષિત રીતે ઉતારવામાં આવ્યું હતું.
વાયરલ વીડિયોમાં જોવા મળ્યું ભયાનક દ્રશ્ય
ઘટનાનો વાયરલ થયેલો વીડિયો વિમાનની અંદરના ભયાનક દ્રશ્યને દર્શાવે છે. વીડિયોમાં કરાના કારણે વિમાનનું જોરદાર ધ્રુજારી સ્પષ્ટપણે દેખાય છે, અને મુસાફરોની ગભરાટભરી ચીસો અને ભયનો માહોલ અનુભવી શકાય છે.
વિમાનમાં સવાર તમામ 227 મુસાફરો સુરક્ષિત
સુરક્ષિત ઉતરાણ પછી, વિમાનમાં સવાર તમામ 227 મુસાફરો અને ક્રૂ સભ્યોને સુરક્ષિત રીતે બહાર કાઢવામાં આવ્યા હતા. જોકે, વિમાનને થયેલા નુકસાનને કારણે, એરલાઇને તેને ‘એરક્રાફ્ટ ઓન ગ્રાઉન્ડ’ (AOG) જાહેર કર્યું છે, એટલે કે સમારકામ ન થાય ત્યાં સુધી તે ઉડાન ભરી શકશે નહીં.
એરપોર્ટ ઓથોરિટી અને ઇન્ડિગોનું નિવેદન
એરપોર્ટ ઓથોરિટી ઓફ ઈન્ડિયાના એક અધિકારીએ જણાવ્યું હતું કે ઇન્ડિગોની ફ્લાઇટ 6E2142 ખરાબ હવામાનમાં કરા પડવાથી બચી ગઈ હતી, જેના પગલે પાયલોટે કટોકટી જાહેર કરી હતી. તેમણે ભારપૂર્વક જણાવ્યું કે તમામ મુસાફરો અને ક્રૂ સુરક્ષિત છે. ઇન્ડિગોએ પણ સત્તાવાર નિવેદન બહાર પાડીને જણાવ્યું હતું કે ફ્લાઇટ અને કેબિન ક્રૂએ નિર્ધારિત નિયમોનું પાલન કર્યું અને વિમાનને સુરક્ષિત રીતે લેન્ડ કરવામાં આવ્યું. શ્રીનગર એરપોર્ટની ટીમે મુસાફરોની સુવિધાનું સંપૂર્ણ ધ્યાન રાખ્યું હતું. વિમાનનું નિરીક્ષણ અને સમારકામ થયા પછી જ તેને ફરીથી ઉડાન ભરવાની મંજૂરી આપવામાં આવશે.
દિલ્હી-એનસીઆરમાં પણ હવામાન ખરાબ, ઘણી ફ્લાઇટ્સ પ્રભાવિત
બુધવારે મોડી સાંજે, ભારે વરસાદ અને કરા પડવાના કારણે દિલ્હી-એનસીઆરમાં પણ હવામાન અચાનક બદલાઈ ગયું હતું. ભારતીય હવામાન વિભાગ (IMD) અનુસાર, આ ફેરફાર હરિયાણા અને તેની આસપાસ રચાયેલા ચક્રવાતી પરિભ્રમણને કારણે થયો છે, જે પંજાબથી બાંગ્લાદેશ સુધીના પૂર્વ-પશ્ચિમ ટ્રફમાં સક્રિય છે. હવામાનમાં થયેલા આ પરિવર્તનને કારણે, દિલ્હીના IGI એરપોર્ટ પર ઘણી સ્થાનિક અને આંતરરાષ્ટ્રીય ફ્લાઇટ્સ રદ કરવી પડી હતી અથવા તેમના રૂટ ડાયવર્ટ કરવા પડ્યા હતા.