ઇલેક્ટ્રોનિક્સ અને માહિતી ટેક્નોલોજી મંત્રાલયે કહ્યું કે કોઈ અનબ્લોકિંગ આદેશ જારી કરાયો નથી, વાયરલ થઈ રહેલા અહેવાલો ખોટા
ભારત સરકારે તે અહેવાલોનું ખંડન કર્યું છે, જેમાં દાવો કરવામાં આવ્યો હતો કે ચીની વિડિયો પ્લેટફોર્મ TikTok પરથી પ્રતિબંધ હટાવી લેવામાં આવ્યો છે. ઇલેક્ટ્રોનિક્સ અને માહિતી ટેક્નોલોજી મંત્રાલયના સૂત્રોએ સ્પષ્ટતા કરી છે કે ભારતમાં TikTok માટે કોઈ પણ પ્રતિબંધ હટાવવાનો આદેશ જારી કરવામાં આવ્યો નથી. આવો કોઈપણ દાવો કે સમાચાર ખોટા અને ભ્રામક છે. જોકે, અન્ય ચીની ઈ-કોમર્સ વેબસાઇટ્સ Aliexpress અને ઓનલાઇન કપડાં વેચતી વેબસાઇટ SHEIN અંગે સરકારે હજુ સુધી કોઈ સ્પષ્ટતા કરી નથી.
જોકે, કેટલાક યુઝર્સ TikTok ની વેબસાઇટને ઍક્સેસ કરી શકતા હતા, પરંતુ તેઓ લૉગ ઇન કરવા, વિડિયો અપલોડ કરવા કે જોવા માટે અસમર્થ હતા. ભારતમાં એપ સ્ટોર પર પણ આ ચીની વિડિયો પ્લેટફોર્મની એપ ઉપલબ્ધ નથી. ટેલિકમ્યુનિકેશન વિભાગના સૂત્રોએ જણાવ્યું કે ઇન્ટરનેટ સેવા પ્રદાતાઓ આ વેબસાઇટને સતત બ્લૉક રાખી રહ્યા છે, પરંતુ તે સ્પષ્ટ નથી કે કેટલાક ઇન્ટરનેટ યુઝર્સ તેને કેવી રીતે ઍક્સેસ કરી શક્યા.
પ્રતિબંધનું કારણ અને પૃષ્ઠભૂમિ
જૂન 2020માં, ભારત સરકારે ૫૯ મોબાઇલ એપ્લિકેશન પર પ્રતિબંધ મૂકવાની જાહેરાત કરી હતી, જેમાં મોટાભાગે ચીની એપ્સનો સમાવેશ થતો હતો. TikTok ઉપરાંત, UC Browser અને WeChat જેવી લોકપ્રિય એપ્સ પણ આ યાદીમાં હતી. સરકારે આ એપ્સને ભારતની સાર્વભૌમતા અને અખંડિતતા, સુરક્ષા અને જાહેર વ્યવસ્થા માટે જોખમરૂપ ગણાવી હતી. આ પગલું ચીન સાથે ભારતના વધતા સરહદી તણાવની પૃષ્ઠભૂમિમાં લેવામાં આવ્યું હતું.
15-16 જૂન, 2020 ની રાત્રે પૂર્વી લદ્દાખની ગલવાન ઘાટીમાં ભારતીય સેનાના જવાનો અને ચીની સૈનિકો વચ્ચે થયેલી હિંસક અથડામણ બાદ બંને દેશોના સંબંધોમાં કડવાશ આવી હતી. ટેક નિષ્ણાતોએ તે સમયે જણાવ્યું હતું કે આ એપ્સ ભારતીય નાગરિકોનો ડેટા ચોરી કરીને ચીન સ્થિત સર્વર્સ પર ટ્રાન્સફર કરી રહ્યા હતા, જે દેશની સુરક્ષા માટે મોટો ખતરો હતો.