એક મહિનામાં ટૌરંગા બંદરે કોકેઈન જપ્તીનો બીજો મોટો કિસ્સો, કસ્ટમ્સ દ્વારા 130 કિલોગ્રામ કોકેઈન જપ્ત કરાયું, બજારમાં NZ$50.44 મિલિયન જેટલી કિંમત
ઇટાલીથી, પનામા થઈને આવેલા મશીનરી ભરેલા શિપિંગ કન્ટેનરમાંથી કોકેઇનનો જથ્થો ઝડપાયો
કસ્ટમ્સ અધિકારીઓએ ટૌરંગા બંદર પરના શિપિંગ કન્ટેનરમાંથી અંદાજિત 130 કિલોગ્રામ કોકેઈન જપ્ત કર્યું છે, જેનું મૂલ્ય NZ$50.44 મિલિયન સુધી હોઈ શકે છે. સોમવાર, 26 મેના રોજ, કસ્ટમ્સ અધિકારીઓએ ઇટાલીથી, પનામા થઈને આવેલા મશીનરી ભરેલા શિપિંગ કન્ટેનરનું જોખમ મૂલ્યાંકન કરતા તેને શંકાસ્પદ માન્યું હતું અને તેને ચેક કરતાં મોટી માત્રામાં કોકેઇનનો જથ્થો મળ્યો હતો.
X-રે અને કસ્ટમ્સ અધિકારીઓની ભૌતિક તપાસના પરિણામે કન્ટેનરના આગળના ભાગમાં ડફલ બેગમાંથી 130 કોકેઈનની ઇંટો મળી આવી, જેમાં પ્રત્યેકનું વજન એક કિલોગ્રામ સુધી હતું. કોકેઈનની પ્રત્યેક ઇંટ પર બહારની બાજુએ સિંહનું ચિત્ર હતું અને તેના પર ‘GGG’ બ્રાન્ડિંગ હતું.
કસ્ટમ્સ મેનેજર મેરીટાઇમ રોબર્ટ સ્મિથે જણાવ્યું હતું કે કસ્ટમ્સ આપણા સમુદાયોને ડ્રગ્સના નુકસાનથી બચાવવા અને કાયદેસરના વેપારને અવરોધ વિના વહેવા દેવા પ્રતિબદ્ધ છે. “કસ્ટમ્સ તરફથી ચાલુ દબાણથી ટ્રાન્સનેશનલ અને ગંભીર સંગઠિત અપરાધ (TSOC) જૂથો માટે દેશભરમાં કાર્ય કરવું વધુ મુશ્કેલ બની રહ્યું છે. અમારી ટેક્નોલોજી અને ક્ષમતામાં નવા રોકાણો સાથે તેમના માટે પરિસ્થિતિ વધુ કઠિન બનશે.”
“આ જપ્તી અમારી ગુપ્તચર પ્રક્રિયાઓ, અત્યાધુનિક ટેક્નોલોજી અને અધિકારીઓના જાણકારીનું પરિણામ છે, જે કસ્ટમ્સને અમારી સરહદોને સુરક્ષિત રાખવા અને TSOC જૂથોને સમુદાયોમાંથી નફો કમાતા અટકાવવા સક્ષમ બનાવે છે.”
સ્મિથે પોર્ટ અધિકારીઓ, પોલીસ અને વેપારીઓ સાથેની ભાગીદારીના મૂલ્યને સ્વીકાર્યું હતું. “આ સંબંધો અમને ડ્રગ્સની દાણચોરીના ખતરાનો સહયોગપૂર્વક, ઝડપથી અને અસરકારક રીતે પ્રતિસાદ આપવા સક્ષમ બનાવે છે. સંગઠિત અપરાધ દ્વારા વેપાર અને આયાતકારોના વ્યવસાય પરની અસરને ઓછો આંકવો જોઈએ નહીં. આ પ્રવૃત્તિઓ ફક્ત આયાતની ગતિ અને ખર્ચને જ નહીં પરંતુ વેપારી રાષ્ટ્ર તરીકે ન્યુઝીલેન્ડની પ્રતિષ્ઠાને પણ નુકસાન પહોંચાડે છે.”
“સરકાર અને ઉદ્યોગ વચ્ચેનો સહયોગ આપણી સરહદને મજબૂત કરી રહ્યો છે અને અમે આ ખતરાને લક્ષ્ય બનાવવા માટે વિકસિત થવાનું અને અનુકૂલન કરવાનું ચાલુ રાખીશું,” તેમ સ્મિથે જણાવ્યું હતું.
તૌરંગામાં કસ્ટમ્સ દ્વારા અગાઉની જપ્તીઓ:
આ મહિનાની શરૂઆતમાં, કસ્ટમ્સ દ્વારા ટૌરંગા બંદર પર ત્રણ અલગ-અલગ કન્ટેનરમાંથી અંદાજિત 157 કિલોગ્રામ કોકેઈન જપ્ત કરવામાં આવ્યું હતું, જેનું મૂલ્ય NZ$60.9 મિલિયન સુધી હતું. (આ જપ્તી 9 મે, 2025 ના રોજ થઈ હતી.)
કસ્ટમ્સ લોકોને અને દરિયાઈ વાતાવરણમાં કામ કરતા લોકોને હંમેશા સતર્ક રહેવા વિનંતી કરે છે. ડ્રગ્સની દાણચોરી વિશેની શંકાઓને 0800 WE PROTECT (0800 937 768) પર વિશ્વાસપૂર્વક અથવા ક્રાઇમસ્ટોપર્સ પર 0800 555 111 પર અનામી રીતે જાણ કરી શકાય છે.