ન્યુઝીલેન્ડ સરકારે એન્ટરપ્રિન્યોર વિઝા બંધ કરીને ‘બિઝનેસ ઇન્વેસ્ટર વિઝા’ રજૂ કર્યા

બે પ્રકારના વિઝા હેઠળ 12 મહિના અને 3 વર્ષનો વર્ક ટુ રેસિડેન્સી ફાસ્ટ-ટ્રેક પાથવે, નવા વિઝાનો હેતુ અનુભવી રોકાણકારોને આકર્ષવાનો છે, જેઓ નોકરીઓનું સર્જન કરી અર્થતંત્રને વેગ આપી શકે

ન્યુઝીલેન્ડ સરકારે દેશના અર્થતંત્રને વેગ આપવા અને નોકરીઓનું સર્જન કરવા માટે એક મોટો ઇમિગ્રેશન ફેરફાર જાહેર કર્યો છે. સરકારે અગાઉના એન્ટરપ્રિન્યોર વર્ક વિઝા ને બંધ કરીને નવા બિઝનેસ ઇન્વેસ્ટર વિઝા (Business Investor Visa) ની રજૂઆત કરી છે. આ નવા વિઝાનો હેતુ એવા અનુભવી વિદેશી રોકાણકારોને આકર્ષવાનો છે જેઓ ન્યુઝીલેન્ડના હાલના વ્યવસાયોમાં રોકાણ કરી તેમને વિકસાવી શકે.

નવા વિઝાના મુખ્ય પાથવે:
નવા બિઝનેસ ઇન્વેસ્ટર વિઝા માટે નવેમ્બર 2025થી અરજીઓ શરૂ થશે, જેમાં રોકાણકારો માટે બે મુખ્ય પાથવે ઉપલબ્ધ છે:

• 12 મહિનાનો ફાસ્ટ-ટ્રેક પાથવે: આ વિકલ્પ હેઠળ, રોકાણકારોએ હાલના વ્યવસાયમાં $2 મિલિયન (લગભગ ₹10.9 કરોડ) નું રોકાણ કરવું પડશે અને ઓછામાં ઓછા એક નવા પૂર્ણ-સમયના કર્મચારીની ભરતી કરવી પડશે. આ પાથવે દ્વારા, રોકાણકાર માત્ર 12 મહિનામાં રેસિડેન્સી માટે પાત્ર બની શકે છે.
• 3 વર્ષનો વર્ક-ટુ-રેસિડેન્સ પાથવે: આ વિકલ્પમાં રોકાણકારોએ $1 મિલિયન (લગભગ ₹5.45 કરોડ) નું રોકાણ કરીને 3 વર્ષ પછી રેસિડેન્સી માટે અરજી કરી શકશે.

બંને પાથવે માટે, રોકાણકારોએ વ્યવસાયને સંપૂર્ણપણે ખરીદવો પડશે અથવા તેમાં ઓછામાં ઓછા 25% હિસ્સો મેળવવો પડશે, જો કે વ્યવસાયનું મૂલ્ય નિર્ધારિત લઘુત્તમ રોકાણ કરતા વધુ હોય.

યોગ્યતા અને શરતો:
ઇમિગ્રેશન મંત્રી એરિકા સ્ટેનફોર્ડે જણાવ્યું કે નવા વિઝામાં અગાઉના વિઝા કરતાં વધુ સ્પષ્ટ માપદંડો છે, જે અરજદારો અને ઇમિગ્રેશન ન્યુઝીલેન્ડ બંને માટે પ્રક્રિયાને સરળ બનાવશે.

• વ્યવસાયની શરતો: જે વ્યવસાયમાં રોકાણ કરવામાં આવે છે તે ઓછામાં ઓછા પાંચ વર્ષથી કાર્યરત હોવો જોઈએ અને પાંચ પૂર્ણ-સમયના કર્મચારીઓને નોકરી આપતો હોવો જોઈએ.
• અરજદારની યોગ્યતા: અરજદારોને ઇંગ્લિશ ભાષાની જરૂરિયાત પૂરી કરવી પડશે અને પૂરતો વ્યવસાયિક અનુભવ ધરાવતા હોવા જોઈએ. રોકાણ માટે કેટલાક વ્યવસાયોને બાકાત રાખવામાં આવ્યા છે, જેમાં ફ્રેન્ચાઇઝી, સુવિધા સ્ટોર્સ અને ફાસ્ટ-ફૂડ આઉટલેટ્સનો સમાવેશ થાય છે.
• નવી નોકરીનું સર્જન: રોકાણકારોએ ન્યુઝીલેન્ડના નાગરિક અથવા કાયમી રહેવાસી માટે ઓછામાં ઓછી એક નવી પૂર્ણ-સમયની નોકરીનું સર્જન કરવું પડશે.

શા માટે ફેરફાર?
સ્ટેનફોર્ડે કહ્યું કે અગાઉની એન્ટરપ્રિન્યોર કેટેગરીમાં અરજીઓની સંખ્યા ઓછી હતી, અરજીઓનો અસ્વીકાર દર ઊંચો હતો અને તેનાથી અર્થતંત્ર પર કોઈ ખાસ સકારાત્મક અસર થઈ ન હતી. વિવેચકોએ કહ્યું હતું કે જૂના વિઝાના માપદંડ અસ્પષ્ટ હતા, જેના કારણે રોકાણકારો તેમના પૈસા ગુમાવવાની ચિંતા કરતા હતા.

આ નવો વિઝા એપ્રિલ 2025 માં રજૂ કરાયેલા એક્ટિવ ઇન્વેસ્ટર પ્લસ વિઝા ઉપરાંત છે, જેમાં $5 મિલિયનથી $10 મિલિયન સુધીના મોટા રોકાણની જરૂરિયાત છે. સરકારે એ પણ જણાવ્યું છે કે ‘સ્ટાર્ટઅપ એન્ટરપ્રિન્યોર’ માટે પણ એક નવા વિઝા પાથવે પર કામ ચાલી રહ્યું છે.