રચના પોતાના પતિ રોઝર સાથે અમદાવાદની મુલાકાત બાદ લંડન જવા નીકળી હતી, વર્ષ 2016થી 2021 સુધી ન્યૂઝીલેન્ડના ઓકલેન્ડમાં રહ્યું હતું દંપત્તિ
ઇમ્પેરિયલ કોલેજની પૂર્વ વિદ્યાર્થિની રચના રોઝર ક્રિશ્ચિયનથી કોલેજ પરિવારમાં શોકની લાગણી
આપણું ગુજરાત ન્યૂઝ. અમદાવાદ/ઓકલેન્ડ: જીવનના સપનાઓ અને આશાઓને પાંખો આપવા નીકળેલા એક પ્રેમાળ દંપતી, રચના અને રોઝર ક્રિશ્ચિયન, અમદાવાદમાં થયેલી ભયાવહ વિમાન દુર્ઘટનાનો ભોગ બન્યા છે. આ હૃદયદ્રાવક ઘટનામાં 240 થી વધુ લોકોએ જીવ ગુમાવ્યા છે. રચના વડોદરામાં એમ.એસ. યુનિવર્સિટીમાં અભ્યાસ કરીને ન્યૂઝીલેન્ડ સ્ટુડન્ટ વિઝા પર આવી હતી જ્યારે તેમના પતિ અમદાવાદના વતની હતા.
ઓકલેન્ડ સાથેનો ભાવનાત્મક સંબંધ: રચના અને રોઝર ક્રિશ્ચિયન ભારતીય દંપતી હતા, જેમણે 2016 થી 2021 દરમિયાન ઓકલેન્ડ, ન્યુઝીલેન્ડને પોતાનું બીજું ઘર બનાવ્યું હતું, ત્યારબાદ તેઓ લંડન સ્થળાંતરિત થયા હતા. રચના 2016 માં સ્ટુડન્ટ વિઝા પર ન્યુઝીલેન્ડ આવી હતી અને સેન્ટ્રલ ઓકલેન્ડની ઇમ્પેરિયલ કોલેજ ઓફ ન્યુઝીલેન્ડમાં અભ્યાસ કર્યો હતો. થોડા સમય બાદ તેમના પતિ રોઝર પણ તેમની સાથે જોડાવા આવ્યા હતા અને માઉન્ટ રોસ્કિલમાં રહેતું હતું.
ઇમ્પેરિયલ કોલેજ ઓફ ન્યુઝીલેન્ડનું રચનાના નિધન પર નિવેદન: ઇમ્પિરિયલ કોલેજ ઓફ ન્યુઝીલેન્ડના પ્રિન્સિપાલ કનવલપ્રીત કૌરે એક સત્તાવાર નિવેદનમાં ઊંડો આઘાત અને દુઃખ વ્યક્ત કર્યું છે. તેમણે જણાવ્યું, “અમને અમદાવાદ, ભારતમાં થયેલી તાજેતરની વિમાન દુર્ઘટનામાં ઇમ્પેરિયલ કોલેજ ઓફ ન્યુઝીલેન્ડના ભૂતપૂર્વ વિદ્યાર્થી રચના ક્રિશ્ચિયન અને તેમના પતિ રોઝરના કરુણ અવસાનથી ઊંડો આઘાત અને દુઃખ થયું છે. રચના 2016 માં અમારી વિદ્યાર્થીની હતી.” કોલેજ પરિવારે તેમના પ્રિયજનો અને આ અકલ્પ્ય કરુણાંતિકાથી પ્રભાવિત થયેલા તમામને હૃદયપૂર્વક સંવેદના પાઠવી છે.
અધૂરા સપના અને પરિવારની પીડા: આશરે 30 વર્ષની વયના આ દંપતી છેલ્લા એક વર્ષથી પરિવાર શરૂ કરવાની આશા સાથે ભારત અને બહાર મુસાફરી કરી રહ્યા હતા. વિઝા શરતોને કારણે તેઓ ન્યુઝીલેન્ડમાં કાયમી નિવાસ મેળવી શક્યા નહોતા અને તેમને ન્યુઝીલેન્ડ છોડવું પડ્યું હતું. લંડન જતા પહેલા તેઓ લગભગ છ મહિના ભારતમાં રહ્યા હતા.
આ કરુણ દુર્ઘટનામાં તેમના અવશેષોની ઓળખ કરવામાં મદદ કરવા માટે ભારતમાં રહેતા તેમના વિસ્તૃત પરિવારોએ તેમના DNA આપ્યા છે. જોકે, સ્થાનિક મીડિયાએ તમામ મુસાફરોના નામ પહેલેથી જ પ્રકાશિત કરી દીધા છે. આ દુર્ઘટનાએ અનેક પરિવારોના સપના છીનવી લીધા છે અને તેમના જીવનમાં કમકમાટીભર્યો શોક પ્રવર્તી રહ્યો છે.