- આસિસ્ટન્ટ કોચ અભિષેક નાયરને પાણીચું અપાયું
- 8 મહિનામાં જ BCCIએ નાયરને દરવાજા બતાવી દેવાયા
- ફિલ્ડિંગ કોચ ટી. દિલીપ અને ટ્રેનર સોહમ દેસાઇની પણ હકાલપટ્ટી
- વલસાડમાં રહે છે ફિઝીકલ ટ્રેનર સોહમ દેસાઇ
- સોહમ દેસાઇ લાંબા સમયથી ટીમ ઇન્ડિયા સાથે જોડાયા હતા
ટીમ ઇન્ડિયાની કેટલીક માહિતી લીક કરવા મામલે કાર્યવાહી કરાયાની ચર્ચા
આ વર્ષે ઓસ્ટ્રેલિયામાં સમાપ્ત થયેલી પાંચ મેચની બોર્ડર-ગાવસ્કર ટ્રોફી (BGT) માં ભારતીય ટીમને 1-3 થી શરમજનક હારનો સામનો કરવો પડ્યો હતો અને શ્રેણી દરમિયાન ડ્રેસિંગ રૂમનીક કેટલીક ગંભીર ખબરોને લીક કરવાના મામલે ભારતીય ક્રિકેટ કંટ્રોલ બોર્ડ (BCCI) એ કાર્યવાહી કરી છે. જેમાં ગુજરાતના વલસાડના ફિઝીકલ ટ્રેનર સોહમ દેસાઇ સહિત આસિસ્ટન્ટ કોચ અભિષેક નાયર તથા ફિલ્ડિંગ કોચ ટી. દિલીપની હકાલપટ્ટી કરવામાં આવી છે.
દુબઈમાં ચેમ્પિયન્સ ટ્રોફી જીતવા છતાં, BCCI એ ફક્ત આઠ મહિનાના કાર્યકાળ પછી સહાયક કોચ અભિષેક નાયરને દરવાજો બતાવી દીધો છે. એ વાત જાણીતી છે કે BGT શ્રેણી પછી સમીક્ષા બેઠકમાં, ટીમ મેનેજમેન્ટના એક સભ્યએ BCCI ને ‘ડ્રેસિંગ રૂમ લીક’ અંગે ફરિયાદ કરી હતી.
નાયર અને દિલીપના સ્થાને હાલ કોઇની નિમણૂંક નહીં
અભિષેક નાયર ઉપરાંત, ભારતીય ટીમના ફિલ્ડિંગ કોચ ટી. દિલીપ અને ટ્રેનર સોહમ દેસાઈને પણ તેમની ફરજોમાંથી મુક્ત કરવામાં આવ્યા છે. સૂત્રોના જણાવ્યા અનુસાર, નાયર અને દિલીપના સ્થાને કોઈની નિમણૂક કરવામાં આવશે નહીં કારણ કે સિતાંશુ કોટક પહેલાથી જ ભારતીય પુરુષ ટીમ સાથે બેટિંગ કોચ તરીકે સંકળાયેલા છે જ્યારે દિલીપનું કામ સહાયક કોચ રાયન ટેન ડોશ્ચેટ જોશે.
સોહમનું સ્થાન એડ્રિયન લી રૂ લેશે
દક્ષિણ આફ્રિકાનો એડ્રિયન હાલમાં IPL ટીમ પંજાબ કિંગ્સ સાથે સંકળાયેલો છે. તે 2008 થી 2019 સુધી કોલકાતા નાઈટ રાઈડર્સ સાથે પણ રહ્યો છે. તેણે 2002 થી 2003 સુધી ભારતીય ટીમ સાથે પણ કામ કર્યું છે. તે IPL પછી ભારતીય ટીમમાં જોડાશે. તેમણે BCCI સાથે કરાર કર્યો છે.
સપોર્ટ સ્ટાફમાં ઘટાડો
ભારતીય ટીમ જૂનમાં ઇંગ્લેન્ડમાં પાંચ ટેસ્ટ મેચની શ્રેણી રમવાની છે. ભારતીય ટીમમાં પરિવર્તનના તબક્કા સાથે, તેના સપોર્ટ સ્ટાફમાં પણ ઘટાડો થશે તેવા સંકેતો પહેલેથી જ મળી રહ્યા હતા ત્યાં હવે દિલીપ અને સોહમ ત્રણ વર્ષથી વધુ સમયથી ભારતીય ટીમ સાથે હતા, તેમને બહારના દરવાજા બતાવી દેવાયા છે.
બીસીસીઆઈ દ્વારા તાજેતરમાં જારી કરાયેલી નવી માર્ગદર્શિકામાં કહેવામાં આવ્યું હતું કે જે સપોર્ટ સ્ટાફનો કાર્યકાળ ત્રણ વર્ષથી વધુ થઈ ગયો છે તેમને દૂર કરી શકાય છે. જોકે, નાયર ટીમ સાથે ફક્ત આઠ મહિનાથી જ જોડાયેલા હતા. ભારતીય ટીમના સપોર્ટ સ્ટાફમાં તાલીમ સહાયક રાઘવેન્દ્ર, દયાનંદ ગરાણી, ફિઝિયોથેરાપિસ્ટ કમલેશ જૈન, માલિશ કરનાર અરુણ કાનડે, ચેતન કુમાર, રાજીવ કુમાર, ટીમ ઓપરેશન મેનેજર સુમિત મલ્લાપુરકર, સુરક્ષા મેનેજર અને અડધો ડઝન અન્ય લોકોનો સમાવેશ થાય છે.
સેન્ટ્રલ કોન્ટ્રાક્ટમાં મોટા ફેરફારો શક્ય
તાજેતરમાં, BCCI ના કેટલાક મહત્વપૂર્ણ લોકોએ ટીમ મેનેજમેન્ટના સભ્યો સાથે બેઠક કરી હતી, જેમાં ખેલાડીઓના સેન્ટ્રલ કોન્ટ્રાક્ટ પર પણ ચર્ચા કરવામાં આવી હતી. ૨૨ માર્ચે, IPLના ઉદ્ઘાટન સમારોહના દિવસે, BCCI એપેક્સ કમિટીની બેઠક કોલકાતામાં મહિલા ક્રિકેટ ટીમના સેન્ટ્રલ કોન્ટ્રાક્ટ અંગે ચર્ચા કરવા માટે મળી હતી.
બે દિવસ પછી, BCCI એ પણ તેને જાહેર કર્યું પરંતુ અત્યાર સુધી પુરુષ ક્રિકેટ ટીમનો સેન્ટ્રલ કોન્ટ્રાક્ટ જાહેર કરવામાં આવ્યો નથી. જો સૂત્રોનું માનીએ તો, સેન્ટ્રલ કોન્ટ્રાક્ટમાં પણ મોટા ફેરફારોના સંકેતો મળી રહ્યા છે. આમાંથી કેટલાક મોટા નામો બાકાત રહી શકે છે. આઈપીએલની ફાઇનલ 25 મેના રોજ છે. આઈપીએલ પછી, ભારતીય ટીમ જૂન-જુલાઈમાં પાંચ ટેસ્ટ મેચ રમવા માટે ઈંગ્લેન્ડનો પ્રવાસ કરશે. આ દરમિયાન સેન્ટ્રલ કોન્ટ્રાક્ટની જાહેરાત થઈ શકે છે.